वैदेशिक रोजगारबाट फर्किएकालाई सोलु दुनपाको सम्मान

कार्यक्रममा वैदेशिक रोजगारीबाट फर्किएर स्वदेशमै व्यवसाय सञ्चालन गर्दै आत्मनिर्भर बनेका ५ जना श्रमजीवीहरूलाई सम्मान गरिएको छ। उनीहरूले विदेशमा आर्जन गरेको सिप, अनुभव र पूँजीलाई स्वदेशमै उपयोग गरी रोजगारी सिर्जना गर्न सफल भएको भन्दै सम्मान गरिएको हो ।

“श्रम आप्रवासनका क्रममा सुशासन: सुरक्षित, मर्यादित र सिपयुक्त आप्रवासन” भन्ने मूल नारासहित आयोजित कार्यक्रममा वैदेशिक रोजगारीका क्रममा अपनाउनुपर्ने सावधानी, सुरक्षित वैदेशिक रोजगारी, श्रमिकका अधिकार तथा आप्रवासनलाई व्यवस्थित र मर्यादित बनाउने विषयमा विस्तृत छलफल गरिएको थियो।

कार्यक्रमको सभापतित्व ग्रहण गर्दै सोलुदुधकुण्ड नगरपालिकाकी उपप्रमुख गान्धी माया तामाङले वैदेशिक रोजगारीमा गएका श्रमिकहरू स्वदेश फर्किएपछि विदेशमा सिकेको सिपलाई व्यवहारमा उतारी देशमै स्वरोजगार बन्नुपर्नेमा जोड दिनुभयो। उहाँले सुरक्षित र मर्यादित आप्रवासनमार्फत मात्रै श्रमिकको भविष्य सुरक्षित हुने बताउनुभयो।

कार्यक्रममा स्थानीय जनप्रतिनिधि, सरोकारवाला निकायका प्रतिनिधि, वैदेशिक रोजगारीसँग सम्बन्धित व्यक्ति तथा श्रमिकहरूको उल्लेख्य सहभागिता रहेको थियो। छलफलका क्रममा वैदेशिक रोजगारीमा जाने श्रमिकलाई सचेत, सुरक्षित र कानुनी प्रक्रिया अपनाएर जान प्रेरित गर्नुपर्नेमा जोड दिइएको थियो।