थुलुङ दुधकोशी : अध्यक्ष राईद्वारा विद्यालय भवनको शिलान्या

सोलुखुम्बु : जिल्लाको देउराली आधारभुत विद्यालय थुलुङ दुधकोशी- ७  बोगलकाे ३ काेठे भवनको शिलान्यास गरिएको छ । यस शैक्षिकसत्रबाट कक्षा वृद्धि गरेको उक्त विद्यालय भवनको गाउँपालिका अध्यक्ष असिम राईले शिलान्यास गर्नुभएको हो ।

गाउँपालिका प्रवक्ता समेत रहनुभएका सोही वडाका अध्यक्ष भोजराज कार्कीका अनुसार वडाको रु.५ लाख र गाउँपालिकाको रु.९ लाखबाट उक्त भवन निर्माण हुनेछ । भौगोलिक हिसाबले कक्षा ६ अध्ययन गर्न १ घण्टा सम्मको यात्रा गर्नुपर्ने विद्यार्थीको बाध्यता र समस्यालाई ध्यानमा राखेर कक्षा वृद्धिको लागि पहल गरिएको प्रवक्ता कार्कीले बताउनुभयो ।

शिलान्यास कार्यक्रममा बोल्दै गाउँपालिका अध्यक्ष असिम राईले पालिकाको पहिलो प्राथमिकतानै शिक्षा रहेको बताउदै आवश्यकताको आधारमा विद्यालय मर्ज र थप गर्ने काम गरिरहेको बताउनुभयो । शैक्षिक सुधारको लागि विद्यालयका सरोकारवाला सबैको भुमिका उत्तिकै हुने भन्दै अध्यक्ष राईले स्थानीय सरकारको तर्फबाट कुनैपनि कसर बाकी नराखेकै कारण एसईई परीक्षामा ९९% विद्यार्थी उत्तीर्ण हुन सफल भएको बताउनुभयो ।

कक्षा थप सम्बन्धि वडाले जायज प्रस्ताव ल्याएकाले अनुमति दिइएको भन्दै अध्यक्ष राईले भवन निर्माण पस्चात शिक्षक पनि व्यवस्थापन गरिने बताउनुभयो ।

शैक्षिक क्षेत्रको विकासका लागि गाउँपालिका अध्यक्ष असिम राई र वडामा अध्यक्ष भोजराज कार्कीको टीमले नतिजा आउने गरि काम गरिरहेको र सोही अनुसार आफुहरुलाई प्रेरित गर्ने काम भैरहेको बताउनुभयो ।विद्यालय व्यवस्थापन समितिका अध्यक्ष पासाङ तामाङको अध्यक्षतामा भएको कार्यक्रममा पुर्व वडा अध्यक्ष राम संघर्ष किराँती, वडा सदस्य लिलामान तामाङ, अम्बिका नेपाली लगायतको उपस्थिति रहेको विद्यालयका प्रधानाध्यापक उत्तम घिमिरेले जानकारी दिनुभयो ।

२०५६ सालमा कक्षा वृद्धि गरी ७ कक्षा सम्म सञ्चालन भएपनि आर्थिक जुटाउन नसक्दा पुनः कक्षा ५ सम्म मात्रै संचालन भएको विद्यालयमा यस वर्ष देखि ६ कक्षा संचालन सुरु भएको छ । तत्कालीन अवस्थामा सरकारबाट सहयोग नभएकै कारण कक्षा घटाउनुपरेको अभिभावकको गुनासो छ । अब भने कक्षा ८ सम्म सञ्चालन हुनेमा अभिभावक ढुक्क छन ।

सोही अबसरमा पर्यटन व्यवसायी चन्द्र बहादुर तामाङले उपलब्ध गराउनुभएको स्टेसनरीका सामाग्री समेत हस्तान्तरण गरिएको छ ।