कक्षा १० को सामाजिक पुस्तकमा रहेको राजा त्रिभुवनको दिल्ली प्रस्थानको मिति सच्याइयो

भक्तपुर, भदौ ५

 पाठ्यक्रम विकास केन्द्रले कक्षा १० को अनिवार्य सामाजिक अध्ययन विषयको पाठ्यपुस्तकमा रहेको एउटा महत्त्वपूर्ण ऐतिहासिक मिति सच्याएको छ। केन्द्रले मंगलबार एक सूचना जारी गर्दै वि.सं. २००७ सालको क्रान्तिलाई सहयोग गर्न राजा त्रिभुवन दिल्ली प्रस्थान गरेको मिति गलत भएको ठहर गर्दै त्यसलाई सच्याउन सबै शिक्षण संस्थाहरूलाई आग्रह गरेको हो।

केन्द्रका अनुसार २०८० सालमा तयार भई कार्यान्वयनमा रहेको कक्षा १० को सामाजिक अध्ययन पाठ्यपुस्तकको एकाइ ७, पाठ १ अन्तर्गत पृष्ठसंख्या १७७ मा रहेको ‘दिल्ली सम्झौता’ शीर्षकमा राजा त्रिभुवनले स-परिवार भारतीय दूतावासमार्फत दिल्ली प्रस्थान गरेको मिति वि.सं. २००७ साल कात्तिक २३ गते भनेर उल्लेख गरिएको थियो।

उक्त मितिबारे प्राप्त रायसुझाव र आधिकारिक अभिलेखका आधारमा खोजी गर्दा राजा त्रिभुवन दिल्ली प्रस्थान गरेको वास्तविक मिति कात्तिक २६ गते भएको पुष्टि भएको केन्द्रले जनाएको छ।

पाठ्यक्रम अधिकृत कुमार घिमिरेद्वारा हस्ताक्षरित सूचनामा भनिएको छ, “दिल्ली प्रस्थान गरेको मिति वि.सं. २००७ साल कात्तिक २६ गते पुष्टि भएकाले पाठ्यपुस्तकमा सोहीबमोजिम सच्याइएको हुँदा सम्बन्धित शिक्षण संस्थाहरूले अद्यावधिक तथ्यअनुसार शिक्षणसिकाइ क्रियाकलाप गर्न गराउनुहुन निर्णयानुसार अनुरोध छ।”

केन्द्रले अबदेखि सबै विद्यालयहरूलाई यही नयाँ र आधिकारिक मितिलाई आधार मानेर पठनपाठन गराउन निर्देशन दिएको छ।