सोलुखुम्बु । सोलुखुम्बुको सोताङ गाउँपालिकाले नागरिक र स्थानीय सरकारबीचको दूरी घटाउँदै प्रत्यक्ष संवाद स्थापना गर्न एक नवीन डिजिटल पहल सुरु गरेको छ। अब स्थानीय बासिन्दाले आफ्ना गुनासो, समस्या वा सुझावहरू अनलाइन फारममार्फत सिधै गाउँपालिका अध्यक्ष र प्रमुख प्रशासकीय अधिकृतसमक्ष पुर्याउन सक्नेछन्।
गाउँपालिकाले सार्वजनिक गरेको अनलाइन प्रणालीमार्फत नागरिकले आफ्नो पहिचान गोप्य राखेर समेत गुनासो दर्ता गर्न सक्नेछन्। गाउँपालिकाले उपलब्ध गराएको क्यूआर कोड (QR Code) स्क्यान गरेर वा तोकिएको अनलाइन लिङ्कमार्फत जो-कोहीले सजिलै गुनासो दर्ता गर्न सक्नेछन्। नागरिकलाई निर्धक्कसँग आफ्ना कुरा राख्न प्रोत्साहित गर्न गुनासोकर्ताको नाम र थर गोप्य राख्न सकिने सुविधासमेत उपलब्ध गराइएको छ, जसले गर्दा पहिचान खुल्ने डर बिना नै समस्या उजागर गर्न सहज हुने गाउँपालिकाको विश्वास छ।
यस प्रणालीलाई थप पारदर्शी र जवाफदेही बनाउन प्राप्त गुनासाहरूलाई हरेक शुक्रबार गाउँपालिकाको आधिकारिक फेसबुक पेजमार्फत सार्वजनिक गरिने व्यवस्था मिलाइएको छ। यस कदमले गुनासो सम्बोधन प्रक्रियालाई प्रभावकारी बनाउनुका साथै आम नागरिकमाझ विश्वास बढाउने अपेक्षा गरिएको छ।
सोताङ गाउँपालिकाको यो डिजिटल फड्कोले सुशासन प्रवर्द्धन गर्दै नागरिकको आवाजलाई नीति निर्माण तहसम्म प्रत्यक्ष रूपमा पुर्याउने लक्ष्य राखेको छ। प्रविधिको प्रयोगमार्फत स्थानीय तहमा नागरिक सहभागिता बढाउने यो प्रयास अन्य स्थानीय तहका लागि पनि अनुकरणीय बन्न सक्ने देखिन्छ।
