सोलुखुम्बु ः हिमाल आरोही कान्छा शेर्पालाई एभरेष्ट टुरिजम लाइफटाइम एचिभमेन्ट अवार्डबाट सम्मान गरिएको छ । तेञ्जिङ नोर्गे शेर्पा र सर एडमन्ड हिलारीसँग पहिलो पटक सगरमाथा आरोहण गर्ने टोलीका एक मात्र जीवित सदस्य कान्छा शेर्पालाई एभरेष्ट टुरिजम अवार्ड, २०२५ को लाइफ टाइम एचिभमेन्ट अवार्डबाट सम्मान गरिएको हो।
शेर्पालाई ५१ हजार एक सय ५१ रुपैयाँसहित दोसल्ला र प्रमाणप्रत्र सहित सम्मान गरिएको आयोजक संस्था एएमएस म्युजिक एण्ड म्यानेजमेन्ट प्रा.लि. का अध्यक्ष सत्यकला तामाङ लामाले जानकारी दिनुभयो ।
सन् १९३३ मा सोलुखुम्बुको नाम्चेमा जन्मनु भएका शेर्पाले २० वर्षको उमेर देखि हिमाल आरहोणमा सक्रिय हुनुहुन्छ । सम्मान ग्रहणपछि उहाँले खुसी व्यक्त गर्दै पछिल्लो समय हिमालबाट हिउँ हराउँदै गएकामा चिन्ता व्यक्त गर्नु भयो ।
पहिलो पटक सगरमाथा आरोहण गर्ने समयभन्दा अहिले हिमालमा धेरै परिवर्तन भइसकेको शेर्पाको भनाइ रहेको छ । साथै जलवायु परिवर्तनको असर सबैभन्दा बढी हिमाली क्षेत्रमा परेकाले यसको क्षति न्यूनीकरणका लागि सबै एकजुट हुन जरुरी रहको शेर्पाको भनाई थियो ।
